Inspektorati Sanitar, me asistencë teknike nga TAIEX, zhvilloi më 29–30 shtator një punëtori dy-ditore ku morën pjesë edhe punonjësit e ekologjisë humane nga IKSHPK, QRSHP-të, dhe përfaqësues nga KRU-të.
Gjatë këtyre dy ditëve, ekspertë nga Italia dhe Portugalia prezantuan dhe diskutuan mbi:
• Standardet dhe ligjet e BE-së për cilësinë e ujit të pijshëm dhe transpozimin e tyre në praktikat vendore;
• Konceptin e Planeve për Sigurinë dhe Mbrojtjen e Ujit të Pijshëm si instrumente kyçe për sigurinë e furnizimit me ujë;
• Produktet e dezinfektimit dhe rreziqet nga nënproduktet e tyre, me shembuj të menaxhimit në vendet e BE-së;
• Vlerësimin dhe menaxhimin e rrezikut në zonat e kapjes së ujit, përfshirë metodologjitë dhe praktikat më të mira;
• Aspektet kimike të ujit të pijshëm: përqendrimet e lejuara të plumbit, roli i mineraleve dhe materialeve në kontakt me ujin;
• Aspektet mikrobiologjike, përfshirë menaxhimin e Legionellës, biofilm-it dhe indikatorët e kontaminimit;
• Planet e Veprimit Emergjent në rast të incidenteve dhe mënyrat e raportimit e trajnimit;
• Identifikimin e prioriteteve kombëtare për përmirësimin e mëtejshëm të cilësisë së ujit të pijshëm.
Ky aktivitet kontribuon drejtpërdrejt në forcimin e kapaciteteve kombëtare për garantimin e furnizimit të sigurt me ujë, në përputhje me standardet e BE-së dhe praktikat më të mira ndërkombëtare, duke mbrojtur shëndetin publik dhe mjedisin.
