Instituti Kombëtar i Shëndetësisë Publike të Kosovës, në bashkëpunim me Ministrinë e Shëndetësisë, organizoi më 3 dhe 4 nëntor trajnime me përfaqësues nga institucionet shëndetësore të vendit.
Në to morën pjesë 76 të nominuar nga QKMF-të e komunave të Kosovës, 14 përfaqësues nga spitalet rajonale dhe 62 pjesëmarrës nga klinikat e QKUK-së.
Trajnimi u udhëhoq nga Prof. Asoc. Valbona Zhjeqi, nga Departamenti i Mjekësisë Sociale në IKSHPK.
Trajnimet u mbajtën në Prishtinë, si pjesë e projektit kombëtar “Matja e kënaqshmërisë së pacientit në kujdesin shëndetësor ambulantor dhe spitalor në Kosovë.”
Qëllimi i trajnimeve ishte aftësimi i stafit shëndetësor për përdorimin dhe interpretimin e të dhënave mbi kënaqshmërinë e pacientëve.
Këto të dhëna grumbullohen në platformën elektronike, përmes plotësimit të pyetësorëve me aplikacion elektronik (QR kod), si në nivel lokal në çdo institucion shëndetësor, ashtu edhe në nivel qendror në IKSHPK, me synim përmirësimin e cilësisë së shërbimeve shëndetësore.
