Fillon shpërndarja e vaksinave të gripit sezonal nëpër komunat e Kosovës

Fillon shpërndarja e vaksinave të gripit sezonal nëpër komunat e Kosovës

image_pdfimage_print

Prishtinë, 30 Nëntor 2020
 
Ministria e Shëndetësisë dhe Instituti Kombëtar i Shëndetësisë Publike i informojnë qytetarët e Republikës së Kosovës se 165.000 vaksinat e para të gripit sezonal, të siguruara nga MSh në funksion të parandalimit të gripit sezonal kanë arritur në Kosovë dhe do të imunizohen grupet më të rrezikuara të popullatës në shtetin tonë.


Ministri i Shëndetësisë z. Armend Zemaj dhe shefi i Zyrës së UNICEF-it në Kosovë, z. Murat Sahin, të shoqëruar nga drejtori ekzekutiv i IKSHPK-së,  z. Naser Ramadani, morën pjesë sot në fillimin e shpërndarjes së vaksinave kundër gripit sezonal për këtë vit në Kosovë.


Që nga mëngjesi i sotëm, ekipet e Qendrave Kryesore të Mjekësisë Familjare të komunave të Kosovës, sipas ftesës që u është bërë një ditë më parë nga MSh dhe IKSHKP, kanë filluar furnizimin me vaksina, me të cilat Njësitë e tyre të vaksinimit do t’i vaksinojnë qytetarët në ditët në vijim.  
 
Vaksinat kundër gripit sezonal, të cilat do të përdoren sivjet, sipas rekomandimeve të bëra nga OBSh, do të jenë katër shtamëshe dhe si të tilla e rrisin fuqinë mbrojtëse ndaj virusëve më agresivë në qarkullim të gripit sezonal.

Ministri Zemaj tha se me 165.000 vaksinat e para, të siguruara, do të imunizohen grupet më të rrezikuara të popullatës në shtetin tonë.

“Ministria është në proces të sigurimit edhe të 50.000 vaksinave të tjera me çka arrijmë të shtojmë për 100 për qind numrin e vaksinave krahasuar me vitin paraprak. Vaksinat e blera nga Ministria e Shëndetësisë përmes UNICEF-it do të shpërndahen dhe jepen falas për qytetarët e vendit tonë. Do të ketë vaksina të mjaftueshme, sipas planit të vaksinimit dhe, sipas nevojës, do të mund të sigurojmë edhe të tjera”, tha Ministri Zemaj.

Ai theksoi se, me qëllim të parandalimit të virusëve sezonal agresiv në qarkullim, MSh ka siguruar vaksina katër – valente,  që kanë fuqi më të madhe vepruese/parandaluese ndaj këtyre virusëve.

Shefi i Zyrës së UNICEF-it, z. Murat Sahin, tha se UNICEF-i i ka punuar ngushtë me MSh-në në sigurimin e vaksinës kundër gripit sezonal dhe se kjo organizatë do të punojë me MSh-në edhe në përpjekjet për të prokuruar dhe furnizuar me vaksina kundër COVID-19.

Drejtori i IKSHPK-së, z. Naser Ramadani, tha se vaksinat do të fillojnë të shpërndahen nëpër njësitë e vaksinimit të Kujdesit Parësor në Komuna (QKMF) ku edhe do të bëhet vaksinimi i grupeve prioritare sipas planit të bërë më herët
 
Instituti Kombëtar i Shëndetësisë Publike i siguron qytetarët se po e monitoron me kujdes situatën epidemiologjike në vend dhe ka rritur vigjilencën për t’u përballur me raste të Gripit sezonal.

print